Бишкекте спирт ичимдигин чогуу ичип отурган адамды өлтүрүүгө шектелип, 32 жаштагы жаран кармалды

Бишкекте адам өлтүрүүгө шектелип 32 жаштагы жаран кармалды. Бул тууралуу Бишкек шаардык ички иштер башкы башкармалыгынын маалымат кызматы билдирди.

Маалыматка караганда, Свердлов районунун ички иштер бөлүмүнө 16-ноябрь күнү киши колдуу каза болгон белгисиз адамдын жансыз денеси табылгандыгы тууралуу маалымат келип түшкөн. Окуя болгон жерге барган милиция кызматкерлери каза болгон жаран 1976-жылы туулган С.Т. экенин аныкташкан. Аталган окуя боюнча Кылмыш-жаза кодексинин 97-беренеси (адам өлтүрүү) менен кылмыш иши козголуп, иликтөө жана издөө иштери башталган.

Издөө иштеринин натыйжасында 2018-жылдын 23-ноябрь күнү кылмышка шектүү катары 1986-жылы туулган Ж.Н. аттуу жаран кармалган.

Алдын ала маалыматтар боюнча жогоруда аты аталган 2 жаран спирт ичимдигин чогуу ичишкен. Көп өтпөй экөөнүн ортосунда чыр чыгып Ж.Н. маркумду туюк нерсе менен сабап өлтүргөн.

Териштирүү иштери аяктагыча кылмышка шектүү 2 айга камакка алынган. Учурда иликтөө уланууда.

Автор: Айзада Тураркулова