Улуу Британиянын ханбийкеси Меган Маркл көйнөк үчүн 500 миң доллар сарптаганы чуу жаратты

Улуу Британиянын ханзаадасы Гарринин жубайы, ханбийке Меган Маркл ысырап кылганы үчүн эл аралык чууну жаратты. Чет элдик басылмалар ханбийке турмушка чыккандан бери 500 миң долларга көйнөк алганын жазып чыгышты.

Белгилүү болгондой, ханбийкенин ысырапкор экени өткөн жылдын жай мезгилинде эле айтыла баштаган. Анда Меган Марклдын айланасындагы адамдар анын бир жолку шопинги үчүн 200 миң доллар акча коротконун айтып чыгышкан. Ушундай күбүр-шыбыр кептерден кийин британиялык көз карандысыз портал ар кайсы мамлекеттердин ханайымдарынын көйнөктөрүнүн баасын изилдеп чыккан.

Тизмектин сап башында Меган Маркл турганы маалым болгон. Ал ханзаадага турмушка чыккандан кийин алган көйнөктөрдүн жалпы суммасы 500 миң доллардан ашкан.

Андан кийинки орунда Даниянын крон-ханбийкеси Мари болгон. Ал жыл ичинде көйнөк үчүн 112 миң доллар сарптаган.

Британия падышалыгынын мүчөсү, ханзаада Эдварддын жубайы, ханбийке Софи Уэссекская 73 миң доллар короткону үчүн алдыңкы үчтүктөн орун алган.

Ал эми Кембридж ханзаадасы Уильямдын жубайы Кейт Миддлтон 86 миң доллар каражат сарптап, ханбийке Меган Марклга салыштырмалуу үнөмдүү экени айтылган. Кейт Миддлтондун бир эле кийимин бир нече ирет кийип, өтө кымбат эмес кийимдерге басым жасаганы жогору бааланган.

Кийим үчүн ашыкча каражат короткондордун катарына 66 миң доллар сарптаган Норвегиянын ханбийкеси Метте-Марит дагы кирген.

Ал эми Иорданиянын ханбийкеси Рания Аль-Абдулла дагы бул тизмекке кошулуп калган. Бирок хан сарайдын кызматкерлери ханбийкени коргоого алган. Тагыраагы, хан сарайдын берген маалыматы боюнча Рания Аль-Абдулла кооз көйнөктөрдү ижарага алган жана ал ысырап кылбай турганы айтылган.

Автор: Бактыгүл Момбекова