Балыкчы шаарында милиция менен прокуратуранын ортосундагы мушташтан кийин прокуратуранын 3 кызматкери жумуштан бошотулду

Кыргыз Республикасынын Башкы прокуратурасы Балыкчы шаарында орун алган жергиликтүү милиция менен прокуратура кызматкерлеринин ортосунда мушташ боюнча текшерүүнү жыйынтыктады. Бул тууралуу Башкы прокуратуранын маалымат кызматы кабарлады.

"Текшерүүнүн жыйынтыгында Башкы прокурордун чечими менен Балыкчы шаарынын прокурору, ага жардамчысы жана прокуратуранын стажеру ээлеген кызматтарынан бошотулду. Бул окуя 23-декабрь күнү орун алган. Анда Балыкчы шаарынын прокурорунун эки жардамчысы менен жол кыймылынын коопсуздугун камсыздоочу инспектордун ортосунда пикир келишпестик чыгып, прокурордун жардамчысы инспекторду чаап жиберген. Мындан улам инспектор шаардык ооруканага жаткырылган. Бул окуя боюнча Кылмыш-жаза кодексинин 305-беренеси (кызматтык ыйгарым укуктардан аша чабуу) менен иш козголуп, иликтөө иштерин жүргүзүү үчүн Ысык-Көл облусу боюнча УКМКга өткөрүлүп берилген. Азыркы тапта иликтөө иштери уланууда", - деп билдирди мекемеден.