Улуу Ата Мекендик согуштун ардагери Гаваз Миңгараев 95 жашында көз жумду

Улуу Ата Мекендик согуштун ардагери Гаваз Миңгараев 95 жашында көз жумду. Маркумду акыркы сапарга узатуу зыйнаты бүгүн, 13-мартта Жалал-Абад шаарында өтүп, ага жергиликтүү бийлик өкүлдөрү, жакындары катышканын мэриянын басма сөз кызматы кабарлады.

Миңгараев 1924-жылы 1-июлда Татарстандын Октябрь районунда төрөлгөн. 1942-жылы 18 жашында Улуу Ата Мекендик согушка аттанып, согуш аяктагандан кийин 1949-жылга чейин Советтик армиянын катарында жүргөн. Андан соң Кыргыз жерине келип, Жалал-Абад облустук ички иштер башкармалыгын жетектеген. Милициянын капитаны Гаваз Миңгараев Жалал-Абад шаарында тартип орнотууда, күч түзүмдөрүн калыптандырууда эмгеги чоң.

Мэриянын берген маалыматына караганда, азыркы тапта Жалал-Абад шаарында Улуу Ата Мекендик согуштун 5 ардагери, оруктун 4 ардагери бар.

SUPER.KG порталынын эмгек жамааты Гаваз Мингараевдин дүйнө салгандыгына байланыштуу анын үй-бүлөсүнүн жана жакындарынын аза кайгысын тең бөлүшүп, терең кайгыруу менен көңүл айтат.

Автор: Жамалидин Парманкулов