19 жашка чейинки кыздардан куралган футбол боюнча улуттук курама команда Бириккен Араб Эмираттарын жеңип алды

Бүгүн, 24-апрелде Бангладештин Дакка шаарында "Bangamata U-19 Women’s International Gold Cup 2019" аталган эл аралык мелдеш старт алды. Мелдештин байгелүү орундары үчүн 6 өлкөдөн келген 19 жашка чейинки кыздардан түзүлгөн курама командалар 2 тайпага бөлүнүп, өз ара ат салышмакчы.

Бириккен Араб Эмираттары жана талаа ээлери болгон Бангладеш өлкөлөрү менен бир тайпага туш келген кыргыз курамасы алгачкы беттешин БАЭге каршы өткөрдү.

Айжан Боронбекова жана Кенжебүбү Ырысбек кызынын голдоруна 1 гана гол менен жооп бере алган БАЭ курамасы 2:1 эсебинде жеңилип, кыргыз футболчулары алгачкы 3 упайга ээ болушту.

Башкы машыктыруучу Наталия Гайворонскаянын шакирттеринин кийинки беттеши 26-апрелде талаа ээлерине каршы өтөт.

Автор: Бекболот Сарыбаев