"Өч алуучулар: Финал" тасмасы кассалык жыйым боюнча дүйнөлүк рекорд койду. Тасма Кыргыз өлкөсүндө бүгүн көрсөтүлүп баштады

"Өч алуучулар" ("Мстители: Финал") тасмасынын финалдык бөлүгү кассалык жыйымдар боюнча дүйнөлүк рекорд койду. Бул тууралуу Bloomberg агенттигинин маалыматында жарыяланды.

Marvel жана Disney киностудиялары жараткан "Өч алуучулар" тасмасынын акыркы финалдык бөлүгү 5 күндүн ичинде эле 1,2 миллиард доллар чогултту. Муну менен Marvel киностудиясы өзүнүн тарыхында былтыркы рекордун жаңылады. Тактап айтканда, өткөн жазда чыккан ушул эле франшизага таандык "Өч алуучулар. Бүтпөс согуш" тасмасы алгачкы аптанын соңунда эле 640 миллион доллар чогулткан. Bloomberg агенттигинин алдын ала божомолдоосунда тасма жалпы 2 жарым миллиард доллар чогултушу күтүлүүдө.

Жаңы "Өч алуучулар" тасмасынын финалы дүйнөлүк экранга 24-апрелде көрсөтүлгөн. Ал эми АКШда 26-апрелде бет ачары болгон. Бишкекте бүгүн, 29-апрелден тартып көрсөтүлүп баштады. "Өч алуучулар-4" Marvel киностудиясынын 11 жылдык "тасма ааламынын" жыйынтыктоочу бөлүгү болуп саналат.

"Өч алуучулардын" акыркы бөлүгү түшкөн каражатына жараша дүйнөдөгү кино сүйүүчүлөр арасында катуу эле "ажиотаж" жаратып жатат. Токтоло кетсек, Кытайда 21 жаштагы студент кыз аталган тасманы көрүп отуруп, сюжеттеги айрым бөлүктөрдөн таасирленип ыйлап баштаган. Токтоосуз ыйлай берген кыз 3 сааттык лента аяктагандан кийин дагы басыла алган эмес. Мындан соң анын колу-буту чымырап, кыймылдай албай калган. Жанындагы достору "Тез жардам" кызматын чакырып, ага медициналык жардам көрсөтүлгөн соң өзүнө келген.

Ушул эле Кытайдын Гонконг шаарында "Өч алуучулардын" күйөрмандары тасманы көрүп чыккан адамды сабап салышкан. Тактап айтканда, токмок жеген адам сеанстан чыккандан кийин залга чыгып кезектеги сеансты күтүп отургандарга кыйкырып, анын сюжетин айтып баштаган. Канчадан бери тасманы ири экрандан көрүүнү күтүп келгендер спойлер кылганы үчүн көрүүчүнү сабап салышкан. Токмоктон жабыркаган адамга медициналык жардам көрсөтүлгөн.

Автор: Гүлжан Асанкожоева