Тарых музейи менен Чолпон-Атадагы ат майдандын оңдолушуна байланыштуу кылмыш иши боюнча соттук уктуруу 31-майга жылдырылды

Тарых музейи менен Чолпон-Атадагы ат майдандын оңдолушуна байланыштуу кылмыш иши боюнча соттук уктуруу жылдырылды. Бул тууралуу бүгүн, 28-майда Сапар Исаковдун жактоочусу Нурбек Токтакунов социалдык тармактагы баракчасына жарыялады.

Маалыматка ылайык, Сапар Исаков соттук алдын ала уктуруу боло турганын бүгүн эле укканын билдирди. Жыйынтыгында соттук уктуруу 31-майга 16:00гө жылдырылды.

Окуянын чоо-жайына кайрылсак:

Башкы прокуратуранын маалыматы боюнча, Тарых музейин оӊдоодо 101,6 миллион сом, ат майданды оӊдоодо 145,9 миллион сом зыян келтирилгени аныкталган. Бул эки кылмыш иши бир өндүрүшкө бириктирилип, алар боюнча курулушка тиешеси бар 6 аткаминерге айып тагылган. Алар:

Премьер-министр Сапар Исаков;
Президенттик аппараттын жарандык өнүгүү, диний жана этникалык саясат боюнча мурдагы бөлүм башчысы Мира Карыбаева;
Мамлекеттик курулуштун башчысынын мурдагы орун басары Алмазбек Абдыкаров;
Турак жай жарандык курулуш департаментинин мурдагы башчысы Шайбек Атамбеков;
Шайбек Атамбековдун орун басары Улукбек Матисаков;
"СМУ-3" курулуш компаниясынын негиздөөчүлөрүнүн бири Айдарбек Мендеев.

Сапар Исаков өз билдирүүсүндө Чолпон-Атадагы ат майданынын курулушун жана Тарых музейин реконструкциялоодо күнөөсү жок экенин айткан. "Курулушту ишке ашырган уюмдар же тендер өткөрүүдө айрым мекемелер тарабынан жасалган кандайдыр бир бузуулардын болгонун жокко чыгарбай туруп айтканда, булар өлкөгө керектүү чечимдер болгон. Мен дайыма өлкөбүздүн жыргалчылыгы үчүн ак иштегем", - деген Исаков.

Автор: Жылдыз Джускембаева