Канадада мектептин полун жууп иштеген адам лотереядан 7 миллион доллар утуп алганы менен жумуштан кеткен жок

Филиппиндин 58 жаштагы Вито Халасан аттуу жашоочусу 2009-жылы турмуш-тиричиликтен кыйналып, үй-бүлөсү менен Канадага көчүп келген. Үч баланын атасы Халасан мектептердин бирине пол жуугуч болуп ишке орношкон. Анын жашоосу жөнүндө чет элдик маалымат булактары жазып, туура он жылдан кийин жашоосунда күтүүсүз өзгөрүү орун алганын белгилеген.

Тактап айтканда, ал лотереядан 7 миллион Канада долларын утуп алган. Ал орто эсепте 345 миллион сомдон ашат. Вито Халасандын көзү жакшы көрбөгөндүктөн лотереянын номерин өтө көпкө чейин тиктеп турган. Канча ирет текшербесин андагы номерлер утушка ээ болгон номер менен дал келген.

Кызыгы, Халасан турмушундагы мындай өзгөрүүлөрдөн кийин да мурдагы жумушунан кетпей турганын айткан. Болгону иштеген күнүн кыскартып, калган убактысын балдарына арнай турганын билдирген. Ал каражатты балдарынын мыкты келечеги үчүн жумшай турганын белгилегени жазылат маалыматта.

Автор: Кызжибек Раимова