Футбол федерациясынын президенти Канатбек Маматов АФКнын президенти, шейх Салман бин Ибрагим Аль Халиф менен жолугушту

Кыргыз Республикасынын Футбол федерациясынын президенти Канатбек Маматов АФКнын президенти, шейх Салман бин Ибрагим Аль Халиф менен жолугушту. Бул тууралуу федерациянын сайтында жазылат.

Маалыматка ылайык, кечээ, 4-июнда Франциянын Париж шаарында Азия футбол конгрессинин атайын расмий иш-чарасы өттү. Андан соң Кыргыз Республикасынын Футбол федерациясынын президенти Канатбек Маматов АФКнын президенти шейх Салман менен жолугушуп, сүйлөшүүлөрдү жүргүздү.

Сүйлөшүүнүн жүрүшүндө АФКнын президенти Кыргыз өлкөсүндөгү футболдун өнүгүүсүндөгү позитивдүү учурларын жана улуттук команданын ийгиликтерин белгиледи. Мындан тышкары алар Кыргыз өлкөсүндөгү жана Борбордук Азиядагы футболдун өнүгүшү жана кызматташуусу тууралуу пикир алмашты.

Кыргыз Республикасынын Футбол федерациясынын президенти Канатбек Маматов - АФКнын аткаруучу комитетинин мүчөсү. Ал Париждеги иш-чарада Кыргыз Республикасынын Футбол федерациясынын, Ооганстандын, Ирандын, Тажикстандын, Түркмөнстандын жана Өзбекстандын футбол уюму кирген Борбор Азия футбол ассоциациясынын (CAFA) өкүлү болуп барды.

Автор: Кызжибек Раимова