"America's Got Talent" долбооруна Кыргыз өлкөсүнөн "Адем" бий тобу катышууда. Долбоордун уюштуруучулары бийчилерди өздөрү чакырган. Бул тууралуу "Адем" тобунун бийчиси Нурсултан Абилов SUPER.KG`ге билдирди.
"America's Got Talent" долбооруна бизди чакырышкан. Негизи долбоордун тандоо туру болгон. Бирок уюштуруучулар бизге биринчи турга келгиле дешти. Ал эми номерибиз дагы чакыргандардын суранычы менен болду. Албетте, өзүбүзгө ишенимдүү болсок дагы, эл аралык масштабдагы сахнага чыкканда толкундандык. Бийибиз бүткөндө калыстар тобунун бардык мүчөсү ордунан туруп, көпкө чейин кол чаап турушту. Албетте, биз үчүн калыстардын ордунан турушу, узакка чейин кол чабуусу күтүүсүз болду.
Биринчи баскыч ушул жылдын март айында орун алган. Экинчи тур бир нече күн мурда болуп катышып келдик. Келишим боюнча экинчи турдун видеосу жарыяланганга чейин жыйынтыгын айтканга болбойт", - дейт ал.