Мушкер Бусурманкул Абдибаит уулунун M-1 Global`дагы мелдеши жылдырылды

Белгилүү мушкер Бусурманкул Абдибаит уулунун M-1 Global`дагы беттеши жылдырылды. Бул маалыматты спортчу өзү тастыктады.

Маалыматка ылайык, мушкердин 5-беттеши 20-июлда Ингушетиянын Таргим шаарында M-1 Challenge 103: Battle in the Mountains 8 турниринин алкагында өтмөк.

"Турнир Ингушетияда болуп жаткан административдик өзгөрүүлөрдөн улам жылдырылды. Беттеш качан болот азырынча белгисиз", - деп билдирди спортчу.

Аталган мелдеште Бусурманкул Абдибаит уулу украиналык Андрей Лежнев менен кез келмек.

Буга чейин Ингушетиянын президенти Юнус-Бек Евкуров отставка сурап Путинге арыз жазган. Өлкө башчысы улуттук телеканалынан атайын билдирүү жасап, Орусиянын президенти Владимир Путинге кайрылганын маалымдаган.

Автор: Айзада Тураркулова