Ошто Ленин чокусунан түшүп келе жатып, дайынсыз жоголгон туристтин жансыз денеси табылды

Ош облусундагы Ленин чокусунан түшүп келе жатып, дайынсыз жоголгон 45 жаштагы туристтин жансыз денеси табылды. Маркум альпинисттер тарабынан табылганын ӨКМнын басма сөз кызматынан кабарлашты.

"И.И. аттуу орус жаранын издөө иштери улантылып, 4-августта ӨКМдан 10 куткаруучу тартылган. Мындан сырткары, "Ак-Сай-Тревел" туристтик компаниясынан 6 альпинист тартылып, алар 6 чакырым 200 метр бийиктиктен маркумдун жансыз денесин табышкан. Альпинисттер маркумду 1-лагерге (чокунун 4 чакырым 400 метр жеринде жайгашкан) алып түшкөн. Бүгүн, 5-августта саат 09:00дө ӨКМдин куткаруучулары менен "Ак-Сай-Тревел" туристтик компаниясынын альпинисттери маркумдун жансыз денесин базалык лагерге (3 чакырым 800 метр жеринде жайгашкан) алып түшүп келе жатышат", - деп билдирди маалымат кызматынан.

27-июль күнү орусиялык жаран Ленин чокусунан түшүп келе жатып, 5 миң метр бийиктикке келгенде байланышка чыгып, ошол бойдон кайра байланышка чыккан эмес. Ошондон бери ал дайынсыз болуп изделип жаткан. Турист "Горы Азии” туристтик фирмасында камсыздандырылган.

30-июлда саат 17:30 чамасында 6300 метр бийиктикте туристке таандык сумка жана визитка табылган.

Автор: Бактыгүл Момбекова