Жалал-Абадда 46 жаштагы бейтаптын жүрөгүнө 6 сааттан ашык операция жасалды

Жалал-Абад шаарындагы Түштүк аймактык жүрөк кан тамыр хирургиясынын илимий борборунда 46 жаштагы бейтапка жасалган операция 6 саатка созулуп, ийгиликтүү аяктаган. Уникалдуу операцияны Түштүк аймактык жүрөк кан тамыр хирургиясынын илимий борборунун жетекчиси, профессор Калдарбек Абдраманов жасаган.

Мындан улам SUPER.KG порталы Абдраманов менен байланышып, операциянын жүрүү процесси тууралуу комментарий алды.

"Операциянын уникалдуу болгонунун себеби жүрөктүн үч клапанында кемтик (порок) бар болгон. Жүрөктүн митралдык капкагы айрылып кеткен, аорта капкагында тубаса кемтик болуп, демейдегидей үч эмес, эки эле капкак болсо, үчүнчү дагы бир чоң үч капкактуу клапандын шакеги кеңейип кеткен.
Андан сырткары, оорулууда инфарктын кесепетинен коронардык тамырлары жабылып калган.
Мындай татаал жүрөк ооруларынын комбинациясы жана аларды бир эле убакта хирургиялык жол менен калыбына келтирүү медицинадагы уникалдуу өтө чанда кездешчү окуя”, - деди Абдраманов.

Операция 1-октябрь күнү жасалган. Учурда бейтаптын абалы калыбына келип, өз алдынча басып, тамактанып калды.