УКМК: "Террордук уюмдун лагеринен атайын даярдыктан өтүп, башчысынын тапшырмасын аткарганга келген деген шек менен 25 жаштагы жаран кармалды"

18-октябрда УКМК жана ИИМдин биргелешкен ыкчам-иликтөө иш-чараларында 25 жаштагы Д.А. аттуу жаран кармалды. Бул тууралуу УКМКнын басма сөз кызматынан билдиришти.

Маалыматка ылайык, Кыргыз Республикасынын аймагына кирүүгө тыюу салынган эл аралык террордук уюмдардын катарына рекруттарды жөнөтүү каналдарына бөгөт коюу максатында жүргүзүлгөн ыкчам иш-чаралардын алкагында шектүү жаран кармалган. Маалыматтар боюнча, Д.А. эл аралык террордук уюмдун лагеринен атайын даярдыктан өтүп, башчысынын тапшырмасы боюнча террордук иш-аракеттерди аткаруу максатында Кыргыз өлкөсүнүн аймагына келген.

"2016-жылдан бери Д.А. аттуу жаран "Жалданмачылык" беренеси боюнча издөөдө жүргөн. Кармалган адам Жалал-Абад ОИИБинин убактылуу кармоочу жайына киргизилди. Азыркы учурда ыкчам-тергөө иш-чаралары жүргүзүлүп жатат", - деп жазылат маалыматта.

Автор: Айсалкын Качкынбекова