Футбол боюнча улуттук курамдын трансфердик баасы көтөрүлдү. Валерий Кичин 1 миллион 500 миң, Гүлжигит Алыкулов 200 миң евро

Transfermarkt.de. беделдүү немис басылмасы "Ак шумкарлардын" акыркы 3 беттештен кийинки трансфердик баасынын өскөнүн билдиришти.

Жакында "Ак шумкарлардын" 13 оюнчусунун трансфердик баасы басылманын сайтына жарыяланды. Анда улуттук курамдын учурдагы баасы 2 миллион 650 миң еврого бааланганы жазылган. Маалыматка ылайык, эң кымбат оюнчу команда капитаны Валерий Кичин (1 миллион 500 миң евро, баалардын баары евро менен көрсөтүлгөн), андан кийин быйыл гана улуттук курамда ойноп баштаган маркум Жаныбек Алыкуловдун уулу Гүлжигит Алыкулов (200 миң), Павел Матяш (150 миң), Азамат Байматов жана Ахлетдин Исраилов (125 миң), Виталий Люкс, Фархат Мусабеков (100 миң), Тамирлан Козубаев менен Миролимжон Ахмедов (75 миң), Эдгар Бернхардт, Алимардон Шүкүров, Акрам Умаров жана Бахтияр Дүйшөбеков (50 миң евро) болгон.
Эске салсак, 2019-жылдын башында Кыргыз курамабыз БАЭде өткөн Азия Кубогунда жарым чейрек финалга чейин чыккандан кийин футболчулардын трансфердик баасы тууралуу жазганбыз. Анда азыркыга салыштырмалуу бир аз айырмачылыктар болгон. Мисалы, Валерий Кичин жыл башында 1 миллион 200 миң евро, Азамат Байматов 150 миң еврого бааланса, Виталий Люкс менен Павел Матяштын баасы өзгөргөн эмес.