Матраимовдун доосу боюнча соттук кароону башка районго өткөрүп берүү боюнча "Азаттыктын" өтүнүчүн сот канааттандырган жок

Матраимовдордун 3 сайтка карата жазган доосу боюнча соттук отурум уланууда. Буга чейин "Азаттыктын" өкүлү Свердлов райондук сотуна карата ишенбөөчүлүк болуп жатканын жана аталган сайт Бишкек шаарындагы Ленин районунда жайгашкандыктан, Ленин райондук сотуна өткөрүп берүүнү өтүнгөн. Сот кеңешме залынан чыгып, бул өтүнүч канааттандырылбаганын айтты. Сот буга чейин маалымат каражаттарынын өкүлдөрүнөн бир да жолу сотту чакыртып алуу өтүнүчү болбогондугу менен түшүндүрдү.

Андан кийин "Клооп" жана "Азаттыктын" өкүлдөрү "ХалыкБанк" аркылуу иликтөөдө жарыяланган акча которуулардын документтерин алып келишкенин, анда 2011-2017-жылдар аралыгындагы которуулар бар экенин айтышты. Бирок Матраимовдордун жактоочусу иликтөөдө жарыяланган жети акча которуунун датасы, суммасы жазылган далилди алып келүүнү айтышты. ЖМКнын жактоочулары банктан бул далилдерди өз алдынча алуу мүмкүн болбой жатканын айтышты. Доогердин өкүлдөрү иликтөөнү жарыялоодон мурун далилдер болушу керек экенин билдирди.

Автор: Кызжибек Раимова