Экс-прокурор Индира Жолдубаеванын жактоочусу Өткүрбек Жамшитовду "дуэлге" чакырды

Экс-прокурор Индира Жолдубаеванын жактоочусу Өткүрбек Жамшитовду түз эфирге "дуэлге" чакырды. Бул тууралуу SUPER.KG порталына Жолдубаеванын жактоочусу Алия Турумбекова билдирди.

Өлкөдөгү укуктук баш аламандык үчүн прокуратура жооптуу деген жактоочу төмөндөгүлөргө токтолду.

"Мен буга чейин өлкөнүн көзөмөлдөөчү органы функционалдык милдеттерин аткарбай жатканын айткам. Азыр дагы ошол оюмдан кайтпайм. Себеби буга чейин Генералдык прокуратурага жазган каттарыма мыйзам чегинде көңүл бурулган эмес. Ал органга мен бардык далилдер жана фактылар менен негизделген арыз-даттанууларымды бир канча ирет жөнөткөм. Бирок жазган каттарыма мыйзам чегинде көңүл бурулбай келгендиктен, ал даттанууларды өлкө башчынын атына кетирүүгө мажбур болдум. Ал эми Башкы прокуратура аларга коюлуп жаткан айып негизсиз экенин айтып, арыздарым мыйзам чегинде каралганын кошумчалашыптыр.

Ошого байланыштуу башкы прокурор Өткүрбек Жамшитовду жана анын орун басарларын түз эфирде жолугушууга чакырдым. Мен алардын алдында символикалык түрдө “кол кабымды” чечип дуэль жарыялаганымдын себеби, эфирде бетме-бет талкууга даяр экенимди билдиргим келди. Башкы прокурорго аялзаты катары эмес, юрист юристке кайрылгандай чакырык таштап жатам. Түз эфирде коомчулукту ким адаштырып жатканын далилдеп бере алам”, - дейт жактоочу.

Автор: Бактыгүл Султаналиева