"Puma" компаниясынын кроссовкилери Адольф Гитлерди элестетет деп сынга кабылды

Германиялык белгилүү спорттук бут кийимдер бренди болгон "Puma" фашизмге айыпталып жатат. Бул тууралуу чет элдик маалымат булактары жазып чыгышты.

Анда компанияны сындап жаткандар "Puma'нын" кроссовкаларына түшүрүлгөн түстөрдүн айкалышынан саясий жана мамлекеттик ишмер, фашисттердин лидери болгон Адольф Гитлердин сүрөтүн байкашканы айтылат.

Спорттук бут кийимдердин бул топтому 2019-жылдын күз-кыш мезгилине арналып чыгарылган. Бут кийимди үстү жактан караганда андагы сүрөт Гитлердин кыйгач кыркылган маңдай чачын жана кыска муруттарын элестетет.

Кырдаалды "Puma" компаниясынын негиздөөчүсү Рудольф Дасслер жана анын агасы Адольф фашисттик режимдин колдоочулары болгону күчөтүп жиберген. Буга байланыштуу аталган компаниянын айланасында бир топ сын-пикир жаралып, ал жаңжалга айланып баратканы айтылат маалыматта.

Ошол эле маалда социалдык тармактын орус тилдүү колдонуучулары бут кийимдин сүрөтүн орус адабиятынын классиги Николай Гоголго дагы окшоштуруп жибергенге жетишкен.

Ал эми "Puma" компаниясы бул салыштыруу жана фашисттик маанай тууралуу эч кандай комментарий бере элек.

Автор: Бактыгүл Султаналиева