Бокс боюнча мурунку дүйнө чемпиону салык төлөбөгөнү үчүн 3 жылга эркинен ажыратылды

Орто салмактагы мурунку дүйнө чемпиону, германиялык Феликс Штурм салык төлөөдөн качкандыгы үчүн эркинен ажыратылды. Бул тууралуу чет элдик маалымат каражаттары жазып чыгышты.

Маалыматка ылайык, 41 жаштагы спортчу салык органдарына жалпы 1 миллион долларга жакын чыгым келтиргендиги үчүн 3 жылга эркинен ажыратылды. Буга чейин аны 5 миллион 800 миң долларга жакын салык төлөбөгөндүгү үчүн күнөөлөп жатышкан.

Штурм карьерасында жалпы 49 беттеш өткөрүп, анын 40 беттешинде жеңүүчү аталган. 2006-жылы орто салмактагы дүйнө чемпиону аталган. 2016-жылы ал орусиялык Фёдор Чудиновду жеңип, суперчемпион аталган. Бирок көп өтпөй, ал титулдан баш тарткан. Анткени анын канында тыюу салынган станозолол препараты табылган.

Автор: Айзада Тураркулова