"90 сомду тапканда берейин деп жалынып, жалбардым". Карызы үчүн электр энергиясын кыркып кетишкенин айткан 70 жаштагы апа ооруканага жатып калды (видео)

Интернетте "90 сом үчүн 70 жаштагы апанын электр энергиясын кыркып кетишти" деген видео тараган. Бул видео "Элдик видео" бөлүмүнө да келди. Аны видеодо сүйлөгөн апаны жакшы тааныйм деген окурманыбыз жөнөткөн.

Видеодо айтылгандай, анда сүйлөп жаткан аял Ысык-Ата районунун Дмитриевка дачасында жашайт.

"Мен муктаждыктан ушул абалды силерге түшүндүрүп берип жатам. Жашым 70те, пенсионермин. Колумда жалгыз бой эне кызым бар. Буга чейин электр энергиясына, коммуналдык жана башка кызматтарга төлөмдү шаштырбайбыз деп айтылбады беле. Өткөндө мен Дмитриевканын электр энергиясын текшерген бухгалтерине 500 сомумду көтөрүп бардым, себеби электр үчүн төлөм 411 сом болгон эле. Кийинки айдыкы 195 сом чыгыптыр. Чогултуп ошол 500 сомду берсем 90 сомду да таап келиңиз деди.

Мен "90 сом жок болуп жатат айланайын, эмкиде таап келейин" десем китепче, акчамды кошуп четке коюп койду. Ыза болуп үйгө келдим, эмне кыларымды билбей эле отуруп калдым. Анан электрик бала текшерип келгенде кеспе деп жалынып, жалбардым. Ага болбой кесип кетти. Андан кийин айыл башчы келинге барайын деп ойлондум, ал туура эмес мамиле жасайт деп угуп жүрчүмүн", - деген апа видеодо.

Бизге кайрылган окурман бүгүн, 9-июнда анын ооруканага жатып калганын кабарлады. Буга себеп айылда ага карата басым болгондугу дейт ал.

"Апа менден акча карыз эле, мындай көйгөлөрү болуп жатканын билбей эле үйүнө баргам. Барсам 20 чакты аял топтолуп, апаны айылдан көчүп кет деп коркутуп жатышыптыр, анын жүрөк оорусу кармап "Тез жардам" чакыртылып, ооруканага алып кетишти", - деди окурман.

Андан кийин SUPER.KG порталы апанын чогуу жашаган кызына байланышты. Өзүн Рано Ж. (ред. аты-жөнүн толук жазган жокпуз) деп тааныштырган кызы төмөнкүлөргө токтолду.

"Апамдын жүрөгүндө маселе бар эле, буга чейин эле дарыгерлердин көзөмөлүндө турчу. Кечээ дачанын башчысы, дагы башка адамдар келип электр энергиясын улап кетишкен. Бүгүн эртең менен апамды "болду эми, көңүлүңүздү көтөрүңүз, электр энергиясы күйдү" деп алаксытып жаткам. Өзүмдүн колумда ымыркайым бар, аңгыча дачанын башчысы 20дай аял менен чогулуп келип, апамды эмнеге видеону интернетке таратасың, сени башка айылга көчүрөбүз деп коркутуп кетишти. Апам Советтер Союзу учурунда мамлекеттик мекемелердин соода тармактарында иштеген сабаттуу адам, канча өзүн колго алайын десе да болбой жүрөк оорусу кармап калды. Азыр ооруканада жүрөбүз, апамдын абалынан чочулап жатам", - деди кызы.

Бул боюнча биз дачанын башчысы делген аялга байланышуу аракеттерин көрүп, бирок аракетибиз ишке ашпады. Андан соң Ысык-Ата райондук администрациясына кайрылдык. Администрациядан окуя тууралуу тактап, көзөмөлгө алышарын, ага карата тиешелүү маалыматтарды беришерин билдиришти.

SUPER.KG порталы бул окуяга тиешеси бар делген бардык тараптардын пикирин угуп, жарыялоого даяр.