ИИМдин Ички аскерлерин Улуттук Гвардияга кошуу сунушталууда

Ички аскерлерди ИИМдин курамынан чыгарып, Улуттук Гвардия менен бириктирүү сунушун бүгүн, 9-сентябрда ЖКнын Сот укуктук маселелер жана мыйзамдуулук боюнча комитетинин жыйынында Коргоо кеңешинин катчысынын биринчи орун басары Кубанычбек Орузбаев билдирди. Айтымында, Коргоо кеңеши мындай чечимди 5-июлда кабыл алган. Депутат Курманбек Осмонов бул сунушту 3 тармактык комитет биригип карашы керектигин белгиледи. “Бул катардагы маселе эмес. Концепциясын, функциясын, канча кызматкер болорун жакшылап аныкташ керек. Бирок мен каршымын”,- деди эл өкүлү. Ал эми депутат Данияр Тербишалиев Улуттук Гвардия эмне менен алек экендигин азыркыга чейин билбестигин айтты. “Улуттук Гвардияда 5 миңге жакын адам эмне кылып жаткандыгы белгисиз. Реформа жүргүзүп, белгилүү бир түзүм түзүү абзел. Укук коргоо органдарын реформалоо абдан маанилүү маселе”,- деди Тербишалиев. Натыйжада депутаттар эл өкүлү Канат Исаевди бул маселе боюнча иштеген комиссиянын мүчөсү кылып киргизүү чечимин кабыл алышты.

Автор: Ширин Жумадилова