Данияда өткөн эл аралык сынакта кыргыз тасмасы "мыкты сценарий" наамына татыды

Кыргыз режиссёру Байзак Маматалиевдин "Кайыкта" аталышындагы кыска метраждуу тасмасы эл аралык сынакта байгеге жетти. Кыргызфильмден кабарлашкандай, сынактык бөлүктө көрсөтүлгөн 14 мүнөттүк тасма "Эң мыкты сценарий" наамын жеңген. Мындан тышкары 2 миң евро акчалай сыйлык ыйгарылган.

Эл аралык фестиваль Даниянын Оденсе шаарында 24-августтан 30-августка чейин өткөн.

“Кайыкта” кыска метраждуу тасманын синопсиси:

Көлдөн кайык менен адамдарды ташып жан баккан 25 жаштагы мусулман жигит христиан дининдеги ай-күнүнө жеткен боюнда бар аялды кайыкка салып, бир жээктен экинчи жээкке жеткирүүгө мажбур болот. Бирок аялдын кайыкта толгоосу күчөп, мусулман жигит христиан аялды төрөтөт.

Автор: Бактыгүл Момбекова