"Күйөөсү, баласы камалып азап тарткан". Садыр Жапаровдун жубайы Айгүл Асанбаева тууралуу 10 факты

Учурда президенттин милдетин аткаруучу жана өкмөт башчылык кызматты бирдей аркалап жаткан Садыр Жапаров бир гана Кыргыз өлкөсүндө эмес, дүйнөлүк коомчулуктун да талкуу чордонунда болууда. Мындайда мамлекет башчынын жубайы да көз жаздымда калбайт. Ошондой эле Садыр Жапаровдун жубайы тууралуу маалыматтар дагы көп адамдарга кызык.

SUPER.KG порталы учурда биринчи айым катары кабылданып жаткан Айгүл Асанбаева тууралуу 10 факты топтоду. Маалыматтар ачык булактардан жана Айгүл Асанбаеванын Садыр Жапаров эркиндикке чыга электе берген маектеринен алынды.

1. Айгүл Асанбаева учурда 47 жашта. Ысык-Көл облусунун Түп районунда туулган. Беш баланын энеси. Алар: Дастан, Рустам, Ринат, Нурдөөлөт, кызы Жанайым.

2. Тун уулу Дастан 27 жашында, 2019-жылдын август айында жол кырсыгына кабылып каза болгон.

3. Мындан бир ай мурун алып баруучу Назира Айтбековага берген маегинде: "Биз түндүк-түштүк деп эч качан бөлүнбөшүбүз керек. Алакандай жерибизди куш деп элестетсек, түндүк анын бир канаты, түштүк бир канаты. Куш бир канаты жок болсо уча албай калат", - деп айткан.

4. Садыр Жапаровго карата саясий куугунтук башталганда жолдошу менен үч жыл чет өлкөдө жашаган. Үй- бүлөсү менен Польша, Орусия, Кипр мамлекеттеринде жүргөнүн айткан.

5. Садыр Жапаров камалгандан кийин "Мекенчил" партиясына мүчө болгон.

6. 1992-жылы февраль айында келин болуп барган.

7. Алты келиндин экинчиси.

8. Садыр Жапаров Айгүл Асанбаева менен 1990-жылы таанышкан. Анда Айгүл Асанбаева 18 жашта, Садыр Жапаров 23 жашта болгон. Классташ кыздары менен жаратылышка эс алууга чыкканда достор аркылуу таанышышкан.

9. 20 жаштагы баласы Рустам камалып калганда ортомчулар аркылуу Раиса Атамбаевага кайрылган. Бирок ал жыйынтык берген эмес.

10. Медициналык училищени аяктагандан кийин Ишеналы Арабаев атындагы университетке тапшырган. Ал жактан жогорку педагогикалык билимге ээ болуп чыккан.