UFC 254: Бүгүн Хабиб Нурмагомедов менен Жастин Гэйтжи беттешет. Гэйтжи сенсация жарата алабы?

Бүгүн, 24-октябрда Абу-Даби шаарына жакын жайгашкан Яс аралында көпчүлүк күтүп келген UFC 254 турнири болот. Турнир Бишкек убактысы боюнча саат 19:00дө башталат. 21:00дө алдын ала карддагы беттештер орун алса, ал эми башкы карддын таймаштары түнгө жакын башталат.

Бул турнирдин негизги беттеши орусиялык мушкер Хабиб Нурмагомедов менен америкалык мушкер Жастин Гэйтжинин ортосунда болмокчу.

Көпчүлүк белгилүү мушкерлер бул беттеш Хабиб Нурмагомедов үчүн оңой болбой тургандыгын айтышууда. Айрымдары беттеш Гэйтжинин жеңиши менен аяктай тургандыгын айтып жатышат. Нурмагомедов акыркы беттешин 2019-жылдын сентябрь айында америкалык Дастин Порьеге каршы өткөргөн. Анда орусиялык мушкер муунтуу ыкмасы менен атаандашын жеңип алган.

Хабиб Нурмагомедов карьерасында жалпы 28 беттеш өткөрсө, баарында жеңүүчү аталган. Жеңилүү ызасын тарта элек Хабиб Нурмагомедов бул беттеш үчүн 3 ай тынымсыз даярданды.

Ал эми 31 жаштагы Жастин Гэйтжи акыркы беттешин май айында мекендеши Тони Фергюсонго каршы өткөргөн. Анда Гэйтжи өзүнүн кубаттуу соккусу менен көпчүлүктү таң калтырып, атаандашынын маңдайкы сөөктөрүн талкалаган.

Гэйтжи өзүнүн карьерасында жалпы 24 беттеш өткөрсө анын 22синде жеңүүчү аталып, 2 ирет жеңилүү ызасын тарткан.

Дүйнө эли күткөн Нурмагомедов-Гэйтжи беттеши саналуу сааттардан соң башталат.

Автор: Азат Бейшенбеков