АКШдагы президенттик шайлоодо 59 миллиондон ашуун адам мөөнөтүнөн мурда добуш берди. Бул тууралуу чет элдик басылмалар жазып чыгышты.
Маалыматка ылайык, Техас шайлоочулардын саны боюнча лидер штат бойдон калууда, ал жакта 7 миллион 193 миң америкалык жаран мөөнөтүнөн мурда добуш берген.
"Кийинки орунда Калифорния 6 миллион 500 миң, андан кийин Флорида 5 миллион 722 миң жана Түндүк Каролина штаты 3 миллион 100 миң адам мөөнөтүнөн мурда добуш берген.
Жоржия, Мичиган, Виржиния, Иллинойс, Огайо, Пенсильвания, Теннеси, Нью-Джерси, Аризона, Колорадо, Вашингтон, Миннесота, Массачусетс штаттарында өз тандоосун мөөнөтүнөн мурда жасагандардын саны миллиондон ашты", - деп жазылат маалыматта.
Ошондой эле 24-октябрда учурдагы президент Дональд Трамп да Флорида штатындагы Уэст-Палм-Бич шаардык китепканасында мөөнөтүнөн мурда добуш берген. Ал коронавирус менен ооруп айыкканынан улам ушундай кадамга барганын айтып, журналисттердин суроолоруна: "Мен Трамп аттуу жигитке добуш бердим", - деген тамашалуу жообун узаткан.
Белгилей кетсек, АКШда президенттик шайлоо 3-ноябрда өтөт. Ага Дональд Трамп менен Жо Байден ат салышууда.