Бишкекте жаран сыналгы жана муздаткычты уурдап бара жатат деп кармалды

Милициянын кайгуул кызматкерлери муздаткыч жана сыналгы уурдаганга шектелген жаранды кармады. Бул тууралуу аталган кызматтан билдиришти.

Маалыматка ылайык, 27-октябрь күнү болжол менен саат 04:10 чамасында Бишкек ШИИББинин 102 кызматына Ак-Босого конушунан сыналгы жана муздаткыч уурдап кетишти деген маалымат келип түшкөн. Айтылган дарекке милициянын кайгуул кызматынын кызматкерлери барып, маалыматты тактаганда, 1983-жылы туулган М.Н. аттуу жаран арыз менен кайрылган. Анда ошол эле күнү көрсөтүлгөн даректе болжол менен саат 04:00 чамасында арыз ээсинин кампасынын ичинен белгисиз жарандар муздаткыч жана сыналгы уурдап кетишкенин айткан.

Ыкчам издөө иш-аракеттеринин негизинде, кылмыштын изи сууй электе шектүү катары 1991-жылы туулган Н.Э. аттуу жаранды унаасы менен качып бара жаткан жеринен колго түшүрүп, Биринчи Май РИИБинин тергөө бөлүмүнө жеткирилген.

Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.

Автор: Айсалкын Качкынбекова