UFC 255: Эже-сиңди Шевченколор бир турнирде беттешке чыгышат

UFC уюмунун чемпиону Валентина Шевченко менен анын бир тууган эжеси Антонина Шевченко 21-ноябрда АКШнын Лас-Вегас шаарында өтө турчу UFC 255 турниринде беттешке чыгат.

Маалыматка ылайык, бул турнирде Валентина Шевченко 32 жаштагы бразилиялык мушкер Женнифер Майя менен чемпиондук кур үчүн беттешсе, ушул эле турнирде Валентина Шевченконун бир тууган эжеси Антонина Шевченко бразилиялык 26 жаштагы Ариана Липски аттуу мушкер айым менен беттешет.

Валентина Шевченко өзүнүн акыркы беттешин 9-февралда UFC 247 турниринде америкалык мушкер Кэтлин Чукагянга каршы өткөргөн. Анда Шевченко атаандашын 3-раундда нокаутка учуратып, чемпиондук курун коргоп калган.

Ал эми Антонина Шевченко өзүнүн акыркы беттешин 31-майда Кэтлин Чукагянага каршы өткөрүп, упайлардын айырмасында утулуп калган.

Автор: Азат Бейшенбеков