"12 миң 500 сом айып салынып, 10 миң сом өлчөмүндө доо коюлду". Чүйдө ашыкча кыргоол аткан жаран кармалды

Белгиленген чектен ашыкча кыргоол аткан жаран кармалды. Бул тууралуу Мамлекеттик экотехинспекциянын басма сөз кызматынан билдиришти.

Маалыматка ылайык, Мамэкотехинспекциянын кызматкерлери тарабынан 30-октябрда браконьерчиликке бөгөт коюу максатында Жайыл районунун Малтабар айылынын түндүк тарабында ыкчам иш-чаралар өткөрүлгөн.

"Рейд учурунда Субару автоунаасы токтотулган. Айдоочу Аламүдүн районунун Лебединовка айылынын Н.С. аттуу жараны экени аныкталып, текшерүү учурунда анын атына катталган тийиштүү документтер: мамлекеттик аңчылык күбөлүгү, №14 мергенчилик мүчөлүк билети жана №03577 кыргоолду атууга сезондук билети болгон.

Ал жаран тарабынан 4 даана кыргоол атылганы аныкталып, ал эми ашыкча кыргоол атканы үчүн “Бузуулар жөнүндө” кодексинин 192-беренесине ылайык 12 миң 500 сом айып салынып, 10 миң сом өлчөмүндө доо коюлду", - деп жазылат маалыматта.

Автор: Гүлзина Каныбекова