Футбол легендасы Диего Марадона каза болду

Дүйнөгө белгилүү футболчу Диего Марадона бүгүн, 25-ноябрда каза болду. Бул тууралуу дүйнөлүк басылмалар жазып чыгышты.

Маалыматка ылайык, Италиянын "Наполи" командасынын жана Аргентина курамасынын мурунку оюнчусу Марадонанын жүрөгү күтүүсүздөн сокпой калган.

11-ноябрда Марадона ооруканадан чыгарылган. Экс-футболчуга гематома боюнча операция жасалган. Марадона ооруканадан чыккандан кийин, алкоголго көз карандылыкты дарылоо үчүн клиникага жеткирилгени белгилүү болгон.

Диего Марадона акыркы жолу 30-октябрда өзүнүн 60 жылдыгына арналган Аргентина чемпионатынын 1-турунун алкагындагы "Гимнасия Эсгрима" жана "Патронато" командаларынын ортосундагы беттеште көрүнгөн. Ал ден соолугу начар экендигин айтып, оюнду толук көргөн эмес. Кийинчерээк анын Буэнос-Айрес шаарындагы ооруканага жаткырылганы маалым болгон.

Автор: Азат Бейшенбеков