Дүйнө Кубогу: Айсулуу Тыныбекованын финалдык беттешинен сүрөттөр

Сербиянын борбору Белград шаарында күрөш боюнча Дүйнө Кубогу өтүүдө. Дүйнө Кубогуна 62 килограмм салмак ченинде катышкан Айсулуу Тыныбекова финалга чейин жетип, финалдык беттеште латвиялык Анастасия Григорьева менен кез келип, атаандашын 0:14 эсебинде эч кандай кыйынчылыксыз мөөнөтүнөн мурда жеңди.

Айсулуу Тыныбекова алгач жалпы 13 балбан катышкан 62 килограмм салмак ченинде 14-декабрда килемге чыкты. Тыныбекова румыниялык балбан кыз Криста Тундени 0:10 эсебинде мөөнөтүнөн мурда жеңип, кийинки баскычта түркиялык Жансу Аксойду ушул эле эсеп менен жеңип алды.

Финалга чыгуу үчүн болгон беттеште Тыныбекова 2019-жылдын Астанада өткөн дүйнө чемпиондугунда күмүш байгеге ээ болгон орусиялык Любовь Овчарованы 13:2 эсеби менен жеңип, финалга чыккан.

Муну менен Айсулуу Тыныбекова Дүйнө Кубогунда алтын медаль уткан экинчи балбан болду. Буга чейин 60 килограмм салмакта күрөштүн грек-рим түрү боюнча Жоламан Шаршенбеков алтын уткан.

Автор: Азат Бейшенбеков