"Жарнамаларга да тартылууга сунуш түшүп жатат". Ырчы Саниа түрк сериалдарында роль жаратууда

Түркиянын Стамбул шаарында жашап, чыгармачылыгын улантып жүргөн ырчы, "Жылаңач баатыр" долбоорунун катышуучусу Саниа түрк сериалдарына тартылууда. Учурда жарнамаларга тартылууга да сунуш түшүп жатканы ырчы менен кабарлашканыбызда белгилүү болду.

"Yasak elma" сериалынын 3 сериясына тартылып, милиция кызматкеринин, бай кыздын ролун жараттым. Мындан тышкары "Tövbeler olsun" сериалында офис менеджери болуп тартылдым. Учурда "Sol yanım" сериалында клубдарга көп барган каармандын образын жаратуудамын. Түрк тасмаларына, сериалдарына тартылууда кыйынчылыктар болгон жок, анткени бул кесипти аябай жакшы көрөм.

Мындан тышкары "Baraj", "Akrep", "Akıncı" деген сериалдарда роль жаратууга, жарнамаларга тартылууга сунуш түшүп жатат", - дейт ал.

Ырчы эки башка жайдан актёрлук чеберчилик боюнча сабак алды. Ал сериалдарга кантип тартылып калганы боюнча мындай дейт.

"Стамбулдан Инстаграмдан чакыруу келди. Атайын кастингдерге барган жокмун. Мен окуган окуу жайдын (Pastel menejerlik) башкы директору Волкан Демир мага менеджер болгону үчүн көп жактарга сунуштап, менин анкетамды жиберип турат", - деп билдирди.

Автор: Бактыгүл Момбекова