"Реал Мадрид" клубунун чабуулчусу Карим Бензема 5 жылга эркинен ажыратылышы мүмкүн

Испаниянын "Реал Мадрид" футболдук клубунун чабуулчусу Карим Бензема 5 жылга эркинен ажыратылышы мүмкүн. Бул тууралуу чет элдик спорттук басылмалар жазып чыгышты.

Маалыматка ылайык, Париж шаардык прокуратурасы футболчу Матьё Вальбуэнанын катышуусундагы интимдик видео менен шантаж кылган ишин сотко өткөрдү. Буга "Реал Мадриддин" чабуулчусу Карим Бенземанын да тиешеси бар. Тергөөчүлөр Бензема шантаж кылгандар менен Матьё Вальбуэнанын ортосунда ортомчу болгон деп эсептеп жатышат. Эгер анын күнөөсү сотто далилденсе, ал беш жылга чейин эркинен ажыратылып, 75 миң евро айып пул төлөйт.

Бул ишти Версаль шаардык соту карайт жана алгачкы соттук отурум март айында башталат.

Эске салсак, Карим Бензема жана дагы бир нече адамдар 2015-жылы Матьё Вальбуэнаны шантаж кылгандыгы үчүн камакка алынып, көп өтпөй бошотулган. Ушундан улам, Карим Бензема менен Матьё Вальбуэна Франция курамасынан четтетилген.

Автор: Азат Бейшенбеков