Караколдогу газ баллондун жарылуусунан жабыркаган бейтап Бишкекке жөнөтүлөт

Каракол шаарында газ баллондун жарылуусунан жабыркаган адам Бишкекке которулат. Бул тууралуу Саламаттыкты сактоо министрлиги билдирди.

Маалыматка ылайык, кечээ, 13-январда саламаттыкты сактоо министри Алымкадыр Бейшеналиев иш сапарынын алкагында Ысык-Көл облустук ооруканасына барган.

"Министрдин катышуусундагы консультациядан кийин бир жабырлануучуну андан-ары дарылануу үчүн Бишкек шаарындагы травматология жана ортопедия илим изилдөө борборуна өткөрүп берүү чечими кабыл алынды", - деп билдиришти министрликтен.

Эске салсак, Караколдогу тез тамактануучу жайдын газ баллону жарылып, бир кыз каза болгон.

Автор: Азат Бейшенбеков