"Баланын бутун тиштеп алган". Казакстанда карышкыр балалуу аялга кол салган

Чыгыш Казакстан облусунун Маралды айылында карышкыр кичинекей балалуу аялга кол салган. Бул тууралуу казакстандык басылмалар жазышууда.

Маалыматка ылайык, аял көчөдөгү малын короого киргизүү үчүн кичинекей баласы менен чыккан учурда карышкыр келип кол салып, баланын бутун тиштеп алган. Ошол учурда аялдын күйөөсү чыгып калып, карышкырды айры менен сайып өлтүргөн.

Эне менен балага дарыгерлер тиешелүү жардамдарды көрсөтүшкөн. Ошондой эле карышкырдан кутурмага каршы анализ алынган.

Куткаруу кызматынын кызматкерлери карышкырдын жалгыз болгондугун айтышкан. Ал оорулуу же болбосо жарадар болуусу мүмкүн, ошол себептүү аң уулай албай калган деп божомолдошкон.

Автор: Гүлзада Абдырахманова