Муфтиятты жети жыл башкарган Максатбек Токтомушев тууралуу маалыматтар

Бүгүн, 10-февралда УКМК Муфтияттагы пара берүү фактысы боюнча маалымат тараткан. Тагыраагы, УКМКнын кызматкерлерине Муфтияттын башкы эсепчиси пара берип жаткан жеринен кармалган. Жогорудагы окуядан кийин муфтий Максатбек Токтомушев өз каалоосу менен кызматтан кетүү тууралуу арызын жазды.

Максатбек Токтомушев 1973-жылы 9-августта Ош облусунун Кара-Кулжа районунда төрөлгөн. 1991-1995-жылдары Ош айыл чарба институтунда окуп, зооинженер адистигин алып, андан кийин Пакистандагы медреседе окуган.

2005-2013-жылдары Бишкектеги медреселердин биринде сабак берген. Ошол эле учурда 2008-2010-жылдары Бишкек шаарындагы мечиттердин биринде имам болгон. 2013-жылдын июль айынан 2014-жылга чейин муфтийдин орун басары болуп иштеп, 2014-жылы муфтий болуп шайланган. Кийинчерээк, 2017-жылы кайрадан муфтий болуп шайланган.

Максатбек Токтомушев үй-бүлөлүү, 4 уул, эки кыздын атасы. Ал кыргыз тилинен тышкары орус, араб жана өзбек тилдеринде эркин сүйлөйт.

Автор: Азат Бейшенбеков