"Кызматын өтөп жаткан милицияны сабашкан". Панфилов РИИБи тергөө жүргүзүүдө

Чүй облусунун Панфилов районунда милиция кызматкерине кол көтөргөн шектүүлөр кармалды. Бул тууралуу Чүй ОИИББинин басма сөз кызматынан билдиришти.

Маалыматка ылайык, 16-февраль күнү Панфилов РИИБинин нөөмөт бөлүмүнө Чалдовар айылындагы эсепке алуу постунда милиция кызматкерине кол салуу болгондугу тууралуу билдирүү түшкөн. Аталган маалыматты алган соң дароо ыкчам-тергөө кызматы чыккан. Милиция кызматкерлери барганда 16-февраль күнү болжол менен саат 16:00 чамасында белгисиз адамдар мас абалында эч себепсиз ошол жактагы кызматын өтөп жаткан кызматкерди ур-токмокко алып окуя болгон жерден качып кеткендиги белгилүү болгон.

Бул факты Кылмыштардын жана жоруктардын бирдиктүү реестрине катталып, сотко чейинки өндүрүш иштери башталган. Бул кылмыштын бетин ачуу максатында ыкчам издөө иш-аракеттеринин натыйжасында 18-февраль күнү шектүү катары 2000-жылы туулган К.Н. кармалып, убактылуу кармачу жайга камакка алынган. Андан кийин дагы эки шектүү 1999-жылы туулган Т.А. жана К.А. аттуу адамдар кармалып, тергөө иш амалдарын жүргүзүү үчүн тергөө кызматына жеткирилген. Учурда бардык керектелүүчү экспертизалар дайындалган.

Автор: Айсалкын Качкынбекова