Камчыбек Ташиев Кубанычбек Жумалиевдин жактоочусунун билдирүүсүнө жооп берди

Улуттук коопсуздук боюнча мамлекеттик комитетинин төрагасы Камчыбек Ташиев Жогорку Кеңештин депутаты Кубанычбек Жумалиевдин адвокаты Бакыт Жумашевдин билдирүүсүнө жооп берди. Бул тууралуу ал социалдык тармактагы баракчасына жазып чыкты.

"Жолдош Жумашев депутат Жумалиевдин мүлкү тууралуу туура эмес маалымат айтканымды айтып жатат. Анда угуп туруңуз. Мен чындыкты айткам, дагы бир нерсени айтып коёюн. Жумалиев бир участокту 17 миң сомго сатып алып, кайра бүгүнкү күндөгү курс боюнча 185 миллион сомго саткан. Эч кандай салык төлөгөн эмес. Буга эмне дейсиз?

Мына ушундай жолдош адвокат. Ал коррупционер. Эми ал уурадагандарын мамлекетке кайтырып берет. Биз аны мыйзамдуу түрдө мажбурлайбыз!" деп жазып калтырган Камчыбек Ташиев.

Эске салсак, коррупцияга шектелип кармалган Жогорку Кеңештин депутаты Кубанычбек Жумалиев УКМКнын тергөө камак жайына киргизилген.

Автор: Айжанар Рыспек кызы