Дары-дармек жеткиребиз деп 90 миң долларын ээлеп алышкан. Бишкекте алдамчылыкка шектүү жарандар кармалды

Бишкекте дары алып келип берем деп алдамчылык менен алектенгенге шектүүлөр кармалды. Бул тууралуу Октябрь РИИБинин басма сөз кызматынан билдиришти.

Маалыматка ылайык, 15-декабрь күнү Октябрь РИИБине Б.И. аттуу жаран арыз менен кайрылган. Анда 2019-жылдын август айында Ш.М. жана М.Р. аттуулар 7-кичи районунда жайгашкан кеңседе арыз ээсинин ишенимине кирип, биргелешкен ишкердикти баштоо жана дары-дармектерди жеткирүү убадасы менен 90 миң доллар каражатын ээлеп алып, убадасын аткарбай из жашырып качып кетишкен.

Бул факты Кылмыштардын жана жоруктардын бирдиктүү рестрине 204-берене "алдамчылык" боюнча катталып, сотко чейинки өндүрүшкө алынган.

"Иликтөө иштеринин жүрүшүндө милиция кызматкерлери кылмышка шектүүнүн изине түшүп, 1980-жылы туулган Ш.Н. аттуу жаранды Бишкек шаарынын аймагынан жана экинчи шектүү 1984-жылы туулган М.Р.ны Жалал-Абад облусунун аймагынан кармашкан. Алар убактылуу кармоочу жайга киргизилди", - деп айтылат маалыматта.

Автор: Гүлзина Каныбекова