Нарында диний-экстремисттик кыймылдын мүчөлөрү диний уюмга мүчө болуудан баш тартышты

Нарын облусунда тыюу салынган уюмдун мүчөлөрү өз ыктыяры менен андан баш тартышты. Бул тууралуу УКМКнын басма сөз кызматынан билдиришти.

Маалыматка караганда, УКМК диний-экстремисттик жана террористтик уюмдарды аныктоо, бөгөт коюу иштеринин алкагында Жумгал районунда диний кырдаал боюнча жалпы түшүндүрүү иш-чаралары өткөрүлгөн.

"Диний экстремизмге каршы туруу боюнча жүргүзүлүп жаткан иш-чаралардын жүрүшүндө Кыргыз өлкөсүнүн аймагында тыюу салынган “Якын-Инкар” диний-экстремисттик кыймылынын ишмердүүлүгүнө айрым жашоочуларды тартуу иштери аныкталды.

Облустук казыяттын кызматкерлери менен биргеликте өткөрүлгөн профилактикалык иш-чаралардын жыйынтыгында, Кыргыз жарандары К.Ш., Э.А. жана Б.Б. аттуу тургундар өз жаңылыштыгын эл алдында моюнга алып, динге ишенгендерди жана экстремисттик көз-карашты колдогон башка мүчөлөрдү исламдын негизинде гана аткарууга чакырды жана бул экстремисттик кыймылдын иш-аракеттеринен мындан ары катышуудан өз ыктыяры менен баш тартышты", - деп жазылат маалыматта.

Эске салсак, буга чейин дагы бир Нарын шаарынын тургуну "Хизбут-Тахрир аль-Ислами” уюмунун идеологиясын колдоп жүргөнүн, ал уюм мыйзамсыз экендигин түшүнүп, өз ыктыяры менен анын идеологиясын колдоодон баш тартканы кабарланган.