Бишкекте мейманканалардын биринен алюминийлерди мыйзамсыз чыгарып бара жаткан жаран кармалды

Бишкек шаарында уурдоого шектүү жаран кармалды. Бул тууралуу Милициянын кайгуул кызматынын басма сөз кызматынан билдиришти.

Маалыматка ылайык, бүгүн, 11-мартта милициянын кайгуул кызматкерлери тарабынан саат 11:20 чамасында Чыңгыз Айтматов көчөсүндө жайгашкан “Ысык-Көл” мейманканасынан чыккан “Hyundai Porter” үлгүсүндөгү унаа токтотулган.

Текшерүү учурунда 1968-жылы туулган айдоочу мейманкананын короосунан сатып өткөрүү максатында алюминийлерди мыйзамсыз чыгарып бара жаткандыгы аныкталган. Бул факты боюнча айдоочуну Ленин РИИБинин тергөө кызматына өткөрүп беришкенин билдиришти.

Автор: Гүлзина Каныбекова