Чүйдө унаа айдап качууга шектүү жаран бир жылдан кийин кармалды

Чүй облусунун Сокулук районунда унаа айдап качууга шектүү жаран кармалды. Бул тууралуу Чүй ОИИББинин маалымат кызматынан билдиришти.

Маалыматка ылайык, былтыркы жылдын февраль айында Сокулук РИИБине 1988-жылы туулган жаран арыз менен кайрылган. Анда 2020-жылдын 10-февралынан 12-феврлына чейинки убакыт аралыгында анын Хонда Фит үлгүсүндөгү унаасын белгисиз бирөөлөр уурдап кетишкенин билдирген.

Бул окуя Кылмыштардын жана жоруктардын бирдиктүү реестрине 206-берене "автотранспорт каражаттарын айдай качуу" боюнча катталып, сотко чейинки өндүрүш иштери башталган.

Издөө иш-чараларынын натыйжасында жогорудагы унааны айдай качууга шектүү жарандардын аты-жөнү такталып, алардын бири кармалып, убактылуу кармоочу жайга камакка алынган. Ал эми жогорудагы кылмыш ишине шектүү экинчи жаран ички иштер органдарынан жашырынып жүргөндүктөн изделип жаткан.

24-март күнү жүргүзүлгөн издөө иш-чараларынын натыйжасында жогорудагы кылмышка шектелип, изделип жаткан жаран кармалып, убактылуу кармоочу жайга камакка алынды. Учурда тергөө иштери уланууда.

Автор: Гүлзина Каныбекова