Чүйдө тамеки товарларын мыйзамсыз сатуу фактысы аныкталды

Чүй облусунан акциздик маркасы жок 4 миң 500 таңгак тамеки табылды. Бул тууралуу Мамлекеттик салык кызматынан билдиришти.

Маалыматка ылайык, салык кызматкерлери Чүй облусунун Токмок шаарында борбордук базарда өткөн пландуу рейддик иш-чаралардын жүрүшүндө тамеки буюмдарын мыйзамсыз сатуу факталарын аныкташты.

"Жыйынтыгында акциздик маркасы жок 4 миң 532 таңгак тамеки тартып алынды. Ишкердик субъекттерге карата мыйзамдарга ылайык чаралар көрүлөт", - деп билдиришти аталган кызматтан.

Салык кызматы жарандарды жасалма тамеки же алкоголдук продукция акциздик маркасы жок тийиштүү лицензиясыз сатылган фактыларды көргөндө 116 номери же 0779 61-31-89 номери боюнча кайрылууга чакырат.

Автор: Гүлзина Каныбекова
Фото: Мамлекеттик салык кызматы