Кыргыз футболдук союзунун башчысы Канатбек Маматов ФИФАга бизнес долбоорлорун каржылоону сунуш кылды

Кечээ, 7-апрель күнү Бахрейнде өткөн Азия футбол конфедерациясынын (АФК) жыйынына Кыргыз өлкөсүнүн футболдук союзунун президенти Канатбек Маматов катышты. Бул тууралуу аталган союздан кабарлашты.

Жолугушууга ФИФАнын президенти Жанни Инфантино да катышты. Иш-чаранын жүрүшүндө Канатбек Маматов АФКга ар кандай бизнес долбоорлорду каржылоону сунуш кылды.

"COVID-19 пандемиясы ар бир мамлекетте футболго байланыштуу өзгөртүүлөрдү киргизүүдө. Пандемиянын азыр токточудай түрү жок. Бардык жерде АФК, ФИФА сыяктуу эл аралык мекемелерде каржы маселеси жаралды. Кыргыз мамлекети сыяктуу бюджети чектелүү өлкөлөрдө чоң көйгөйлөр жаралышы мүмкүн. ФИФА менен АФКда футбол ассоциацияларына каржылык жактан жардам берүү мүмкүнчүлүгү дагы деле болсо бар. Мисалы, ФИФА COVID-19га байланыштуу көйгөйлөрдү чечүү үчүн пайызсыз насыя берүүгө даяр. Бирок кээ бир бирикмелерде ошол каражатты төлөөдө кыйынчылыктар болушу мүмкүн", - деген ал.

Автор: Самира Шарипова