"4500 доллар". Ошто Илбирстин 3 терисин мыйзамсыз сатууга аракет кылып жаткандар кармалды

Экологиялык коопсуздук жаатындагы мыйзамсыз аракеттерди аныктоо жана бөгөт коюу боюнча жүргүзүлүп жаткан иш-чаралардын жүрүшүндө илбирстин 3 терисин мыйзамсыз сатууга аракет кылып жаткандар аныкталды. Бул тууралуу Улуттук коопсуздук боюнча мамлекеттик комитетинен билдиришти.

"К.А.С. аттуу адам Тажикстандын жарандарынан алган илбирстин үч терисин Ош шаарында 4 миң 500 АКШ долларына сатууну пландаштырган. Жүргүзүлгөн ыкчам-тергөө иш-чараларынын жыйынтыгында терилерди сатуу учурунда К.А.С. аттуу адам кармалды", - деп билдиришти УКМКдан.

Белгилей кетсек, илбирс улуттук мыйзамдардын чегинде корголуп, Кызыл китепке кирген жаныбар, Бишкек шаарынын символу жана аны сатуу мыйзамсыз болуп эсептелинет.

Бул факты Кылмыштардын жана жоруктардын бирдиктүү реестрине 293-берененин негизинде (Кызыл китепке кирген жаныбарларды жана өсүмдүктөрдү жок кылуу) катталган.

Учурда бардык жагдайларды аныктоо жана башка шериктерин табуу боюнча сотко чейинки өндүрүш иштери улантылууда.

Автор: Азат Бейшенбеков