Бишкекте унаа айдап качууга шектелип өспүрүм балдар кармалды

Бишкек шаарында унаа айдап качканга шектүү жарандар кармалды. Бул тууралуу Милициянын кайгуул кызматынын басма сөз кызматынан билдиришти.

Маалыматка ылайык, 15-апрелде болжол менен саат 03:43 чамасында 102 кызматына Көк-Жар кичи районунан унааны мыйзамсыз айдап кетти деген маалымат келип түшкөн.

Бул факты Кылмыштардын жана жоруктардын бирдиктүү реестрине 206-беренеси "автотранспорт каражаттарын айдап качуу" менен катталып, сотко чейинки өндүрүшкө алынган.

"Айтылган дарекке ошол замат милициянын кайгуул кызматкерлери барып, маалыматты тактаганда болжол менен саат 03:20 чамасында Гольф-3 үлгүсүндөгү унааны белгисиз жарандар мыйзамсыз айдап кеткендиги аныкталган.

Издөө иш-чараларынын жүрүшүндө кылмыш изи сууй электе Достоевский көчөсүнөн айдап бара жаткан жеринен кылмышка шектүү катары 17,16 жаштагы балдар кармалып, Октябрь РИИБинин тергөө кызматына өткөрүлүп берилген", - деп жазылат маалыматта.

Автор: Гүлзина Каныбекова
Фото: Миициянын кайгуул кызматы