Бишкекте жоогазынды үзүп жатканы видеого түшүп калган жарандар аныкталды. Алар телефон уурдоого шектелүүдө

Бишкекте уурулук кылганга шектелген жарандар кармалды. Патрулдук милициянын басма сөз кызматынан кабарлашкандай, буга чейин Фрунзе жана Ибраимов көчөлөрүнүн кесилишиндеги гүлдөрдү үзгөндөр дал ушул адамдар болгон.

Маалым болгондой, 19-апрелге караган түнү саат 00:55 чамасында укук коргоочулардын нөөмөт бөлүмүнө билдирүү келип түшкөн. Анда Фрунзе жана Ибраимов көчөлөрүнүн кесилишинде жабырлануучунун телефонун тартып алганы кабарланган.

"Айтылган дарекке кайгуул кызматкерлери барганда, 1993-жылы туулган жаран уюлдук телефонун жана акча каражатын тартып алган белгисиз адамдарга карата чара көрүү өтүнүчү менен кайрылган.

Ыкчам издөө иштеринин жүрүшүндө, шектүү катары 1994-жылы жана 1997-жылы туулган жарандар кармалды.

Жогорудагы факты Кылмыштардын жана жоруктардын бирдиктүү реестрине 201-берене ("уурулук") менен катталып, сотко чейинки өндүрүш иши башталды. Белгилей кетсек, ушул эле жарандар Фрунзе жана Ибраимов көчөлөрүнүн кесилишиндеги жоогазындарды үзүшкөн", - деп маалымдашты мекемеден.

Автор: Бактыгүл Момбекова