"Литвага виза алып берем деп акчасын алган". Бишкекте алдамчылыкка шектүү жаран кармалды

Бишкек шаарында алдамчылыкка шектүү жаран кармалды. Бул тууралуу Октябрь РИИБинин маалымат кызматынан билдиришти.

Билдирүүгө ылайык, 3-мартта Октябрь райондук милициясына шаар тургуну арыз менен кайрылган. Анда 14-январда 9-кичи районунан арыз ээсинин ишенимине кирип Литвага виза алып берем деген шылтоо менен 1 миң 200 доллар акча каражатын алып, убадасын аткарбай изин жашырганын жазган.

Бул факты Кылмыштардын жана жоруктардын бирдиктүү реестрине 204-беренеси "алдамчылык" менен катталып, сотко чейинки өндүрүшкө алынган.

Иликтөө иштеринин натыйжасында жогорудагы кылмыш ишине шектелип 1992-жылы туулган жаран кармалып, СИЗО-1ге эки айга камакка алынган. Милициядан учурда тергөө иштери уланып жатканын кошумчалашты.

Автор: Гүлзина Каныбекова