Талкууга түшкөн коляска. "Ал апасын ооруканага жаткырган баланыкы" дейт Ош шаардык оорукананын дарыгери

Бүгүн, 14-майда социалдык тармактарда пластикалык отургучтан жасалган ден соолугунун мүмкүнчүлүгү чектелген жарандардын коляскасынын сүрөтү кызуу талкууга түштү.

Айрым колдонуучулар бул көрүнүштү кыргыз медицинасынын азыркы абалына салыштырган.

Кийинчерээк аталган сүрөт Ош шаардык ооруканасында тартылганы айтылган.

SUPER.KG порталы Ош шаардык оорукананын башкы дарыгери Кыял Ташболотовго байланышканыбызда, төмөнкүлөрдү билдирди.

"Бул жаңылык чыкканда эртең менен барып бөлүм башчы менен жолугуп тактадым. Бул коляска биздин оорукананын коляскасы эмес. Ал апасын ооруканага жаткырган баланын коляскасы. Ал бала апасын ооруканадан чыгарарда кийинчерээк алып кетем деп айтып таштап койгон экен. Аны бирөөлөр көрүп калып, интернетке чыгарышыптыр. Ал бала ушул коляска менен апасын ооруканага алып келген. Такталбаган нерсени бирөөнү каралоо максатында чыгаруу жакшы эмес", - деди Ташболотов.

Автор: Айзада Кыдырмышева