Молдовановкада абактагы эки соттолуучу качууга аракет кылган. Аларга карай ок атылып, бири каза болду

Чүйдүн Молдовановка айылында 25-майдан 26-майга караган түнү саат 02:40тар чамасында №27 жазаларды аткаруу кызматында соттолгон 58 жана 22 жаштагы эки жаран тосмо аркылуу качууга аракет кылган. Бул тууралуу Юстиция министрлигине караштуу жазаларды аткаруу мамлекеттик кызматынан билдиришти.

Маалыматка ылайык, аталган департаменттин коргоо кызматындагы жоокери эки жаранды качып бара жатканын аныктап, алгач эскертүү иретинде асманга ок аткан. Кийин качып бараткандарга карай ок чыгарып, бирөө жеринен каза болуп экинчиси кармалды.

"Соттолгон эки жаран өзгөчө оор кылмыш (адам өлтүрүү, өспүрүмдү зордуктоо) үчүн жазаларын өтөп жатышкан. Алар 10 жана 21 жылга эркинен ажыратылган. Учурда милиция кызматкерлери качып кетүү аракети боюнча тергөө ишин баштады. Бул окуя Кылмыштардын жана жоруктардын бирдиктүү реестрине катталды", - деп жазылат билдирүүдө.

Автор: Гүлзина Каныбекова