Бутун өбүүгө мажбурлаган. Ден соолугунун мүмкүнчүлүгү чектелген кызга кордук көрсөткөн окуя Ташкентте болгон

Социалдык тармактарда ден соолугунун мүмкүнчүлүгү чектелген кызга (дүлөй жана дудук) кордук көрсөткөн видео тарады. Окуя Ташкентте болгон. Бул тууралуу өзбек басылмалары жазып чыгышты.

Маалыматка ылайык, 25-майдан 26-майга караган түнү саат 03:15те медициналык "Тез жардам" мекемесине 24 жаштагы денесинде көк ала тактары бар Мохизода В аттуу кыз жеткирилген. Ал жолдон өтүп бара жаткан "Тез жардам" унаасын токтотуп, медициналык жардамга муктаж экендигин жаңсап көрсөткөн. Ошол эле учурда бутундагы ур-токмоктун изин көрсөткөн. Мохизода үйүнөн эмне себептен чыгып кеткенин түшүндүрө алган эмес.

Белгилүү болгондой, 24-майда 28 жаштагы Мумтозбегим Д. жана анын 20 жаштагы Диёра Б. жана 23 жаштагы Мукаррам М. аттуу эки таанышы Мохизода В.ны ур-соккуга алышкан.

Окуянын бардык катышуучуларынын аты-жөнү такталып, соттук-медициналык экспертиза дайындалган. Тиркелген видеого кызды аялдын бутун өбүүгө мажбурлап жатканы тартылган.